BG For Bernie Grant in memoriam (1934-2000) like a skilled tradesman yu pave di way fram di shap floor to di council chamebah all di way up to Parlament front door an den yu entah as a membah an wi remembah di rupshan ovah tatnam missis Jarrett awt-attack (doun a brixtan Detective Lovelock shat Cherry Groce in her back) di rage an di staam di det af P C Blakelock braad watah faam                     yu woz wi cheef                     yu woz wi choice                     yu woz wi champian                     yu woz wi face                     yu woz wi voice                     yu woz wi main man an wi remembah ow di press an di res try fi lynch yu ow dem try fi tar an feddah yu ow di haringey massive rally roun yu ow yu mek black peeple feel proud a yu an wi remembah ow yu bill di unity in yu community dedicate yuself to yu constituency brace yu braad back gense bigatri an stan firm fi justice an equality                     yu woz wi cheef                     yu woz wi choice                     yu woz wi champian                     yu woz wi face                     yu woz wi voice                     yu woz wi main man dem seh dat if yu goin into pallytics yu haffi well tuff an can tek nuff licks yu woz wi Ali inna im prime yu jab dem wid yu leff yu hook dem wid yu rite an yu tek trute force an beat dem everytime now it look like loudah bells a try fi toll wi tale but a fi yu precedent agoh prevail dem noh know ow di parson get im gown but all now mi still a hear fi yu soun                     yu woz wi cheef                     yu woz wi choice                     yu woz wi champian                     yu woz wi face                     yu woz wi voice                     yu woz wi numbah wan